Бүгін халықаралық балаларды қорғау күні. Бұл күні барлық ата-ана кішкентай балақайларға ерекше көңіл бөледі. Ауыл-аймақ, қалаларда осы күнге арналған түрлі концерттер ұйымдастырылып, тіпті кейбір компаниялар немесе орталықтар аталған күні балаларға арнап арнайы сый дайындайды. Балалар күнін өткізу жөніндегі шешім 1949 жылдың қараша айында Парижде Халықаралық демократиялық әйелдер федерациясының арнайы сессиясында қабылданады. Ал Халықаралық балаларды қорғау күні алғаш рет 1950 жылы атап өткізілді. Шын мәнінде балалардың әр күні мереке болуы тиіс. Олардың өмірінің қауіпсіз болуы, соғыстан қорғау, денсаулығын сақтау, болашақ ұрпаққа білім мен тәрбие беру барлығы кез келген адамның міндетіне кіру керек. Бұдан бөлек, әлем халықтары 20 қарашада Халықаралық нәрестелер күнін, 16 маусымда Африкада балаларды қорғау күнін мерекелейді.

Бүкіл әлемде сияқты Қазақстанда 1 маусым Халықаралық балаларды қорғау күні ретінде аталып өтеді. Халықаралық балаларды қорғау күніне арналған іс-шаралар республикадағы үш миллионнан астам баланы қамтиды.

Мегаполисте ойын-сауық шоулары, тақырыптық мерекелер мен фестивальдар өтеді, деп хабарлайды Almaty.tv.

2022 жылдың 27 мамырында Алматы қаласы Фтизиопульмонологиялық орталық мамандарының ұйымдастыруымен №21 санаториялық балалар бақшасында «Әрқашан күн сөнбесін» ұранымен «Балаларды қорғау күніне» арналған іс-шара өтті.

Шарада балалар түрлі-түсті бормен асфальтқа сурет салды. Іс-шараға үлкен топтың балалары қатысты.

Барлық балаларды төл мерекелерімен құттықтаймыз! Болашақ ұрпақ әрқашан бейбітшілікте өмір сүруіне және елін, жерін қорғайтын азаматтар болып өсуіне тілектеспіз! Балалар жыламасын!